.

حسین جاوید: پیغمبر

پیغمبر 101 یاشیندا

همت شهبازی

....

حسین جاویدین «پیغمبر» اثری‌نین چاپ اولماسیندان 101 ایل کئچیر. بو اثر تورکجه‌سی ایله یاناشی فارسجاسی ده، اکبر حمیدی علیار جنابلاری‌نین چوخ گؤزل و روان ترجمه‌سی ایله 1392ده نشر اولوبدور.

دئییرلر حسین جاوید «ابلیس» اثری ایله انسانی محو ائدیر، «پیغمبر» اثری ایله ایسه، اونو اوجالدیر.

هر ایکی اثره دیققتله یاناشدیقدا یازیچینی دوشوندورن مسئله انسانلار آراسیندا سورجلی اولاراق سنگیمه‌ین «ساواشلار»دیر. بیرینجی دونیا ساواشی نتیجه‌سینده میلیونلار گوناهسیز انسانین تؤکولدویو قانی، حسین جاویدی دهشته گتیره‌رک انسان آدلی مخلوقدان بئزدیینی گؤروروک ابلیس اثرینده. او بو اثرده ابلیس‌لشمیش انسان اوبرازینی یارادیر.

پیغمیر پیئسی دؤرد پرده‌ده، هر پرده ایسه پیغمبرین یاشام و ائتدییی ساواشلارلا ایلگیده‌دیر: بعثت، دعوت، هجرت و نصرت.

شاعیر هر ایکی اثرین باشلانغیجیندا اساس اوبرازلاری، «مَلَک»له راستلاشدیریر. «ابلیس» اثرینده مَلَک ابلیس‌له، پیغمبر اثرینده ایسه پیغمبرله. هر ایکیسینده ده مَلَک یول گؤستریجی رولونو اویناییر.

پیغمبرله ملک یالچین داغ آرخاسیندا گؤروشور و ملک اونا دونیانی ایشیغا، انسانلاری خوشبخت ائدن «آلتین کیتاب»ی وئریر. ایلک دفعه بئله ایشله راستلاشان پیغمبر شاشقین قالیر. یو اثنادا شاعیر فیلوسوف تیپلی «ایسکئلئت» آدلی بیر اوبرازی پیغمبرین قارشیسینا گتیریر. ایسکئلئت اوبرازی دوشوندوروجو دوشونجه صاحیبلی بیریسی‌دیر. اونون دیلیندن سؤیله‌نیلن دوشونجه‌لر (ص198) سانکی شاعیرین اؤز دوشونجه‌سی‌دیر. بو اوبراز، پیغمبر اوبرازی‌نین عکسینه اولاراق مادی اوبرازدیر. او پیغمبره دئییر کی انسانلاری، آلتین کیتابلا مطیع و اطاعت‌جیل ائتمک اولماز. بونا گؤره پیغمبره بیر «قیلینج» وئره‌رک، اونو قیلینج‌لا مقصدینه چاتا بیله‌جه‌یینی وورغولاییر. بونو قبول ائتمه‌ین پیغمبر تانریدان وحی گؤزله‌ییر. تانری‌نین تکلیفی گلمیر. آنجاق مقصدلرینه یئتیشمک اوچون ائتدییی ساواشلار(غزوه)، ایسکئلئت اوبرازی‌نین دوشونجه‌سی‌نین تصدیق‌لمه‌سی آنلامیندادیر. بونو پیغمبر اؤزو ده «نصرت» پرده‌سینده قیلینجی ایسکئلئت‌دن آلارکن تصدیقله‌ییر.

دئمک انسانلار ساواشلارین قوربانلیسی اولور. شاعیر ایسه، ایکی اثرده اولان ایکی ساواشین آراسیندا ایکینجیسینه حاق قازاندیراراق اونو، بؤیوک آمال‌لارلا نتیجه‌لندیینه گؤره ساوونور!

بیز ابلیس اثرینه آیریجا دؤنه‌جه‌ییک. کیتابلا قالین!

موغان- 22/4/1402