اؤزلرینی تورک بیلمهینلر همت شهبازی
.
اؤزلرینی تورک بیلمهینلر
همت شهبازی
قوزئی آذربایجان تدقیقاتچی و یا آنتولوژی توپلایانلارینین بیر عادتی واردیر. عؤمور بویو بیرجه مصراع تورکجه یازمایان بیر سیرا شاعیر و یازارلاری او جوملهدن علی اکبر دهخدا، عارف قزوینی، میرزاده عشقی، زینالعابدین مراغهای، طالبوف تبریزی، تقی رفعت، پروین اعتصامی، جعفر خامنهای و... آذربایجان ادبیاتی آدینا سیریماق ایستهییرلر. اونسوز دا بونلار اؤزلرینی تورک ادبیاتینا عاید بیلمهمیشدیلر. اوستهلیک عارف قزوینی کیمی شاعیر تورک دیل و کیملییی ایله ضیدیتده اولدوغو بللیدیر. واختی ایله محمدامین رسولزاده، علیبی حسینزاده، روشنی بی کیمی تورک یازار و آیدینلارینین علیینه اولاراق او تبریزده فارسجا کنسئرتلر وئریر. بونونلا او تورک دیلی، تورکچولویون عکسینه اولاراق آنتیتورک اولدوغو مئساژینی دا وئرمیشدیر. بونلاری ادبیاتیمیزا داخیل ائدهرک وطنسئور ائتمهییمیزین سببلرینی آنلایا بیلمیرم. بئله یاناشمالار، بونلارلا چاغداش اولان اثرلرینی بوتونلوکله تورکجه یازان – و بونا دا اؤیونن- معجز شبسترلی کیمی شاعیرلرین حاققینا مداخیله ائدهرک دیلیمیزده اولان پایینی کیچیلتمیریکمی؟
مسئلهنی یبر آز دا بایاغی لاشدیرماق اولار. بو گون گونئی آذربایجان محیطینده ده بیر سیرا اؤزلرینی بیزلردن بیلمهین شاعیر، یازیچی، ایدمانچی، اویونچو، ایش آداملارینی زورلا اؤزوموزه سیریماق ایستهییریک. بیزیم حیاتیمیزین اونلارا اهمیتی اولمادیغی بیر حالدا، بیزلر دریدن-قابیقدان چیخیریق اونلاری تورک اولدوقلاری اوچون شخصی وثیقه ادارهسیندن توتموش ائولرینین ایچینه قدر بیگیلر توپلاییب یایماقلا مشغول اولوروق. اؤزلرینی تورک بیلن، دوغما دیلی و مدنیتینه ایللر بویو قوللوق ائدنلریمیز حاقدا دا بو قدر دریدن- قابیقدان چیخیریقمی؟
بو وئبلاگ ادبی - نظری وئبلاگ دیر بو ساحه لرده بوتون یازی لاری قبول ائده رک یازارلارین اؤز آدلاریلا یایماغا حاضیردیر