مولود سلیمانلی‌نین کؤچ رومانی / همت شهبازی 

 

🌿 تورکجه‌میزین اعجازکار و اونون چئشیدلی سؤز دونیاسی‌نین قایناغی اولدوغونو دویماق ایسته‌ییرسینیزسه مولود سلیمانلی‌نین «کؤچ» رومانینی اوخوماق یئتر. بو رومان، دیلیمیزین بوجاقلاردا گیزلی قالمیش سؤز ییغناغی، ایفاده سؤزلویودور. داها چوخلاری اوچون قدری- دَیَری بیلینمه‌ین سؤزلرین نورمال آخارلیغینی بئینیمیزه هوپدوران بیر دیلی وار بو رومانین. بونو اوخویان کیمسه، تورکجه‌میزین زنگین‌ و اَنگین‌لیینی دویمایا بیلمز. سؤزون سئحیری بیردن بیره انسانی رئال دونیادان قوپاریر، اونو گیزلی هوجئیره‌لرده فیرلاداراق سوندا او قدر اینجه‌لیکله رئال حیاتا جالاشدیریر کی انسان حئیران قالیر. بونا گؤره کؤچ رومانی، بیزی میفیک-فولکلوریک کیملییمیزین درین‌لیینه جالاشدیریر.

🌱 دیل، بیردن بیره ناغیل‌لاشیر. اوخوجو حیس ائدیر کی «مین‌بیرگئجه» و یا خود آشیق‌لارین سؤیله‌دییی داستانلارا قولاق آسیر. بونلارلا یاناشی اوخوجو دا آیاغینی گئرچک حیاتدان اوزور. او دا بیر آنلیغا میفیک-فولکلوریک دونیایا آددیم آتیر. آنجاق یازیچی، اونلاری یالنیز بو دونیادا ساخلامیر. اونا گؤره کی اوخوجو بیردن بیره چاغداشلامیش دونیا ایله اوزلشن اوبرازلاری گؤرور گؤز اؤنونده. او، انسانین اجتماعی حیاتینی قبیله‌چیلیکدن، دره‌بی‌لیکدن (ملوک‌الطوایفی) توتموش چاغداش حیاتداکی سوسیالیستی رئالیزمین طبقه‌لشمه قاتینا قدر بیر دؤور سوردویونو گؤستریر. بو باخیمدان اثر، سوسیالیستی رئالیزمی سوررئال، داها دوغروسو من دئیردیم سئحیرلی بیر رئالیزمله عکس ائتدیرمه‌یه چابا گؤستریر. یعنی اثرین اساس موتیوی طبقه‌لشمه موتیوی اولماقلا یاناشی، اونون ایفاده طرزی ایسه، سئحیرلی بیر رئالیزمله باش توتدوغونو گؤروروک.

🌱🌱🌱