صالح عطایی (انستاگرام صفحه سیندن)
صالح عطایی
(انستاگرام صفحه سیندن)
کیمی‌لرین بیرجه دوشوندویو دیلین ساغلام قورولوشودور؛ مدرن شعردن ده اولجه بونو ایسته‌ییرلر! کیمی‌لری مدرن شعر تاریخیمیزی بوتؤولمه گؤرمه‌مزلییه وورور، کیمی‌لری‌سه اونو اوخومادان، ایزله‌مه‌دن کوچومسه‌ییر... کئچن گون‌لرده بیر سانباللی غزل شاعیریمیز ده بئله بویورموشلار: مدرن شعریمیز تک‌سسلی و مونولوگ‌دور. شاعیرلرین هامیسی بیر بیچیمده و بیر دیلده یازیرلار...
منجه "آذربایجان شعرینده مدرنیزم" اثرینین بیرینجی دیری مدرن شعریمیزله یاخیندان ایلگیلنمه‌سینده‌دیر.
همت شهبازی‌یه گؤره حبیب ساهیر یئنی شعریمیزین بانی‌سی اولاراق، مدرن شعریمیز اوختای‌لا باشلاییر؛ ۷۰جی ایل‌لرده بؤیوک گلیشمه‌لر وار، بو اون ایلده استعاری، اسطوره‌وی و سوژئت دیلی‌له فرقلی شعر مجموعه‌لری یاییلیر. ۸۰ و ۹۰جی ایل‌لرده ائپیک شعر، بیلیمسل شعر، نانو شعر، جینسل شعر، قیسا شعر، انتئلئکتوال شعر، ناتورال شعر... و همت شهبازی بو ۱۲۰۰ صفحه‌لیک کیتابیندا بوتون بو شعر جریان‌لارینین فرقلی دونیا گؤروش‌لرینی، فورم‌لارینی، باشقا استئتیک یؤن‌لرینی... آراشدیریب تانیتدیرماغا چالیشیر.
بو کیتابی اوخویوب بیتیرمک اوزون بیر یولجولوغو بیتیرمک کیمی‌دیر. و من کیمسه‌نین بو یولدان الی‌بوش قاییتماسینا اینانمیرام. البته هر بیر دیرلی کیتاب کیمی ده دارتیشیلاجاق قونولاری- اوجومله‌دن ائپیک شعره، فئمینیسمه یا موسیقی‌یه اولان گؤروش‌لری- چوخدور سانیرام.
همت شهبازی‌یه اوزون عؤمور و یئنی اوغورلار دیله‌ییرم.
بو وئبلاگ ادبی - نظری وئبلاگ دیر بو ساحه لرده بوتون یازی لاری قبول ائده رک یازارلارین اؤز آدلاریلا یایماغا حاضیردیر