شعر: همت شهبازی

اؤلوم اورادایدی،
سیگارانین جیلیز یانغیسیندا
ایکی بارماق ایله
دوداقلارین سومورماسیندا
هر زامانکی کیمی
منه باخیردی،
هر زامانکی کیمی
من ده اونا باخیردیم،

اؤلن‌لر
کؤلگه‌لرینی اسدیریردیلر
ساکیت آخان زامانین عقربه‌لرینده
نیلوفر قوخوسو اوزانیردی
دووارلاریندا کی اوستوندن
گئجه‌نین قارانلیغیندا
اولدوزلانیردی چیچک‌لری،
پاریلداییردی
اؤلومون دیب اوتاغیندا
سایخینلاشدیغی دوواریندان
اؤلوم قوندوغو ‌قارانلیق گئجه‌ده
بیر پیشیک باخیشی‌نین ایشارتیسی
آینایا جالانیردی،
یونگول،
اؤلچوسوز
و گؤزه گلمز

https://telegram.me/dusharge