همت شهبازی : آذربایجان دیل و ادبیاتینین درس واحدلرینین ایلک یازانلاری
همت شهبازی
آذربایجان دیل و ادبیاتینین درس واحدلرینین ایلک یازانلاری:
رحمتلیکلر:
(پروفسور حمید محمدزاده، دوکتور محمدعلی فرزانه، دوکتور جواد هیئت)
هیجری 1372.جی ایلین اردیبهشت آیی تبریز دانشگاهینین فارس ادبیاتی اوزره اوچونجو تئرمده اؤیرنجی ایدیم. طرلان قولییئو باکیدان تبریزه گلمیشدی تدقیقی ایشلر اوچون. اونو تانییردیم. الیمیزدن گلن قدر من و اوستاد باریشمازین اوغلو، عزیز دوستوم "کاوه" ایله بیرلیکده اونا ایشلرینده یاردیم ائدیردیک. بیر گون طرلان معلم آذربایجانیمیزین نهنگ آدلاریندان اولان " پروفسور حمید محمدزاده، دوکتور محمدعلی فرزانه، دوکتور جواد هیئت"ین ادبیات فاکولتهسینه گلدیکلرینی و فاکولتهنین رئیسی اولان دوکتور رضا ایراندوست تبریزینین اوتاغیندا اولدوقلارینین خبرینی وئردی.
طرلان قولییئو اونلاری گؤرمک اوچون گؤزلهییردی. هئچ بیر یئره گئتمهدن اورادا قالیب گؤزلهمهلی اولدوق. چوخ اوزون چکدی. نهایت اوتاقدان چیخدیلار. اوزون دانیشیقلار آپاردیقلارینا باخمایاراق سئوینجی اونلارین گولر اوزلریندن سئزمک چتین دئییلدیر. اونلار تبریزه اونا گؤره گلمیشدیلر کی 153 واحد (او زامان بو قدر یا بوندان بیر آز چوخ- هرحالدا 150 واحددن آشاغی دئییلدی لیسانس کورسو) آذربایجان دیل و ادبیاتیندا درس واحدلرینی اورتایا قویسونلار. بونو من، بیر گون سونرا بیلدیم.
رحمتلیکلر یورغون چیخدیلار. دوکتور ایراندوست اونلارلا گؤزل داورانمیشدی. بونو بیر-بیرلریله دوستجاسینا داورانماقلاریندان دویماق اولوردو. دوکتور ایراندوست اونلاری یاخشی تانییردی. اؤزو ده ائله فرانسا دیل و ادبیاتینین سایغیدَیر اوستادلاریندان ایدی.
اونلار بیر-بیرلریندن آیریلدیقدا نهایت من، دوکتور جواد هیئته یاخینلاشدیم.
(دیرناق آراسی بیر مسئله: دوکتور هیئتین یادداشینا حئیران قالدیم. دوکتور منی 6 آی اوندان قاباق بینالخالق دیللر کونفرانسیندا گؤرموشدو. او زامان باکیدان پروفسور واقیف اصلانوف گلمیشدی. من بیر شعر اوخودوم شعرده "گئرچک" کلمهسینی ایشلتمیشدیم. واقیف معلم اونون نه اولدوغونو سوردوقدا دوکتور هیئت اونو آچیقلادی. ایندی منی گؤرمکله، او خاطیرهنی 6 آیدان سونرا دوکتور هیئت عینی ایله خاطیرلایاراق منی تانیدی و رحمتلیک محمدزاده و فرزانهیه ده بونو سؤیلهدی).
فاکولتهنین ائشیینده اونلارین دانیشیقلاریندان بیلدیم کی اونلار "آذربایجان دیل و ادبیاتی" نین تبریز دانشگاهیندا قورولماسی اوچون گلمیشلر. طرلان قولییئو، هوتئللرینین آدرئسینی آلدی. گئجه اونلارین یانینا گئتمیشدی. منیم بوندان صاباحیسی گون خبریم اولدو.
صاباحیسی گون اونلارین یولونو گؤزلهدیم. گلدیلر. آنجاق تلهسیردیلر. واخت آز ایدی. اونا گؤره اونلار یئنه ده دانیشیق اوچون رئیسین اوتاغینا گئتدیلر. قولییئو ایله من ائشیکده گؤزلهمهلی اولدوق. اوزون چکدی. بونا گؤره، گؤره بیلمهدیک.
طرلان قولییئو گئجه هوتئلده درس واحدلرینین آدی و واحدلرین لیستینی آلمیشدی. واحیدلر یانیلمیرامسا 3 صفحه ده تایپ اولموشدو. عرب الیفباسی ایله. اونون بیر اوزونو قولییئو کوپی ائدیب گتیرمیشدی. منه گؤستردی.
او واحدلرین اوزونه حسرتله باخدیم. بو حسرت گؤزومون باخیشینین اوزونتوسوندا هله ده اوزوناماقدادیر. 23 ایلدیر گؤزومون قاباغیندا واحیدلر فیرلانیر:
نسیمی 2 واحید
فضولی 4 واحید
آذربایجان ادبیات تاریخی 8 واحید (یعنی آذربایجان ادبیاتی 1، 2، 3، 4 : هر بیریسی 2 واحید)
معاصر ادبیات 2 واحید
ادبی تنقید 2 واحید
آذربایجان شیفاهی ادبیاتی 2 واحید
و .....
قالانی یادیمدان چیخمیش ............
(عمومی واحیدلر 20 واحید.. عمومی واحیدلری بیلمهدیم فارسجا اوخومالی ایدیلار یوخسا تورکجه)
گؤرهسن 23 ایل (بلکه ده چوخ) حسرته سون قویماق اولاجاقمی؟
بو وئبلاگ ادبی - نظری وئبلاگ دیر بو ساحه لرده بوتون یازی لاری قبول ائده رک یازارلارین اؤز آدلاریلا یایماغا حاضیردیر