فرئدريك نيچه : زردوشت بئله دئدي

(هامي نين و هئچ کيمين کيتابي)


چئويره ني: آيبنيز عباسووا


6- جي بؤلوم


اوخو و يازي حاققيندا
يازيلار ايچينده قان يازيسيني سئويرم. قانينلا ياز، اوندا گؤررسن کي، قان روحدور.
اؤزگه قانيني آنلاماق آسان دئييل: بئکارچيليقدان اوخويانلاردان زهلم گئدير.
اوخوجونو تانييان اونونچون اليني آغدان قارايا دا وورمور. اوخوجولار داها بير عصر ياشاسا، گؤرريک کي، روح اؤزو ده پيس اييلنه جک.
هر يئته نين اوخوماغي اؤيرنمک حاققین اولماسي، آخيردا، نه اينکي يازيني، فيکري ده کورلاياجاق.
بير زامان روح آللاه ايدي، سونرا انسانا دؤندو، ايندي ايسه او لاپ قاراگوروها چئوريلير.
قان و معمالارلا يازانلار اوخونولماق دئييل، ازبرلنمک ايسته يير.
داغلاردا ان کسه يول زيروه دن-زيروه يه گئدن يولدور؛ آمما بونونچون اوزون آياقلارين اولماليدير. معمالار زيروه اولماليدير: اونلارين موراجيعت ائتديکلري آدام ايسه بؤيوک و گوجلو اولماليدير.
هاوا آچيق، تميز، تهلوکه ياخين، روح ايسه شنليکله دولو: بونلار هاميسي بير-بيرينه چوخ ياراشير.
ايسته ييرم باشيما کوبولدلار* (آلمان ميفولوگياسيندا يئرآلتي ثروتلرين قورويوجوسو - ه.ه.). ييغيلسين، چون جسورام من.
کابوسلاري اورکودن جسارت اؤزو اوچون کوبولدلار يارادير - جسارت گولمک ايسته يير.
داها من سيزينله بيرليکده حيس ائتميرم: آلتيمداکي بو بولود، باشينا گولدويوم بو قارا بولود و آغيرليق، - بودور سيزين شيمشکلي بولودونوز.
قالخماق ايسته ينده سيز يوخاري باخيرسينيز. منسه آشاغي باخيرام، چونکي يوخاردايام.
سيزلردن کيم زيروه ده اولا-اولا گوله بيلر؟
ان هوندور داغلاري قالخانلار بوتون صحنه و حيات فاجيعه لرينه گولور.
قايغيسيز، لاغباز، گوجلو - عاغيل بيزي بئله گؤرمک ايسته يير: او قاديندير و يالنيز ايگيدلري سئوير.
دئييرسينيز: "حيات دؤزولمزدير"! او حالدا بس سيزين گوندوزکو غرورونوز و آخشامکي ايطاعتينيز نه يه گرکدير؟
حيات دؤزولمزدير؛ اؤزونوزو يالاندان نرمه-نازيک گؤسترمه يين! بيز هاميميز قشنگ يوک ائششکلرييک.
اوستونه دوشن بير داملا شئهدن تيتره ين تومورجوقلا اورتاق نه کسييميز وار؟
دوزدور، بيز حياتي سئويريک: حياتا دئييل، سئوگييه آليشديغيميز اوچون.
هر سئوگيده دايم بير آز دليليک اولور. دليليکده ده دايم بير آز عاغيل.
و حتتا حيات عاشيقي اولان منه ائله گلير کي؛ کپنکلر، صابون کؤپوکلري و اونلارا بنزه ين انسانلار خوشبختليک حاققيندا هاميدان چوخ بيليرلر.
بو يونگول عاغيلسيز ظريف هره کي خيرداجا قلبلرين پروازيني سئير ائتمک زردوشتون روحونو ترانه لره و گؤز ياشلارينا قدر مست ائدير.
ايناناسي اولسام، يالنيز رقص ائتمه يي باجاران آللاها اينانارديم.
ايبليسيمي گؤردوم: يامان جيددي، آغير، ادالي توتوردو اؤزونو: بو آغيرليق روحو ايدي او؛ هر شئيين يئره دوشمه سينه باعث ده اودور.
غضبله دئييل، گولوشله اؤلدوررلر. قالخين، آغيرليق روحونو اؤلدورمه يه بيزه يارديمچي اولون!
گزمه يي اؤيرنديم؛ او واختدان اؤزومه قاچماغي دا روا بيلميشم. اوچماغي اؤيرنديم، او واختدان من يئريمدن ترپنمک اوچون کناردان تکان گؤزلميرم.
ايندي يونگوللشميشم، ايندي اوچورام، ايندي اؤزومه اوستدن آشاغي باخيرام، ايندي آللاه اؤزو بئله ايچيمده رقص ائدير.
زردوشت بئله دئدي.
داغدا کي آغاج حاققيندا
زردوشتون گؤزو آلميشدي کي، بير گنج اوندان يان گزير. آخشامين بيرينده تک باشينا "الوان اينک" آدلي بو شهرين دؤرد دؤوره سيني سارميش داغلاري گزنده زردوشت همن گنجي گؤردو، او، آغاجا سؤيکه لي اوتورموشدو، يورغون باخيشلاري دره يه ديکيلميشدي. زردوشت اوغلانين سؤيکندييي آغاجدان ياپيشيب بئله دئدي:
"بو آغاجي سيلکله مک ايسته سم، باجارمازديم.
آمما بيزيم گؤرمه ديييميز کولک اونا ظولم ائدير، ايسته دييي سمته اَيير. بيزي بوندان دا چوخ اَيین گؤرونمز اللر وار " .
گنج پرت اولوب آياغا قالخدي و دئدي: "زردوشتون سسيني ائشيديرم، ائله اينديجه اونو دوشونوردوم".
زردوشت جاوابيندا: "داها قورخماق نييه - دئدي. آغاجين باشينا گلن انساندان دا يان کئچمير.
او يوکسکلره، ايشيغا نه قدر جان آتيرسا، کؤکلري يئرين تکينه، آشاغي، ظولمتلره، ديبه، - شره او قدر چوخ ايشله يير".
"بلي، شره! - گنج اوجادان دئدي. -نئجه اولور کي، سن منيم قلبيمي اوخودون»؟
زردوشت گولومسوندو: "ائله قلبلر وار کي، اونلاري اوخوماق اولمور، اوندا اونلاري اول اويدورماق لازيم گلير".
"بلي، شره"! - گنج سؤزو تزه دن چئويردي. - دوز دئدين، زردوشت! داها اؤزومه اينانميرام. يوکسکلييه جان آتماغا باشلاياندان سونرا نه اؤزوم اؤزومه نه ده باشقالاري منه اينانمير، - بو نئجه اولدو آخي؟
چوخ تئز دييشيليرم: بو گونوم دونه نيمي اينکار ائدير. قالخارکن بعضي پيلله لرين اوستوندن آتيليرام: - هئچ بير پيلله ده بونو منه باغيشلامير.
يوکسکده اولاندا گؤرورم کي، تنهايام. مني دينديرن اولمور، تنهاليغين شاختاسي ايليييمي چالير. يوکسکده نه لري آختاريرام؟
نيفرتيم ده حسرتيمله قوشا بؤيويور؛ يوکسه يه قالخديقجا، قالخانلارا نيفرت ائديرم. يوکسکده نه لري آختاريرلار؟
اؤز ديرماشماغيمدان و بودرمه ييمدن نئجه ده اوتانيرام! اؤز تنگ نفسيمه نئجه ده لاغ ائديرم! اوچانلارا نئجه ده نيفرت ائديرم! يوکسکليکده اولماقدان نئجه ده بئزميشم».
بو يئرده گنج سوسدو. زردوشت ايسه، يانيندا اولان آغاجي نظردن کئچيريب بئله دئدي: "بو آغاج داغدا تک-تنها دوروب، او انساندان و حئيواندان يوکسکده بيتيب.
ايشدير، دانيشماق ايسته سه، آنلاياجاق کيمسه سي تاپيلمازدي: ائله يوکسکده بيتيب.
ائله هئي گؤزله يير، گؤزله يير، - گؤزله دييي ندير بس؟ بولودلارا چوخ ياخين ياشايير: يقين ايلک شيمشه یي گؤزله يير او"؟
زردوشت بونو سؤيله ميشدي کي، گنج فغان ائتدي:
"ائله دير، زردوشت، دوز دئدين. يوکسه يه جان آتارکن اؤلوم آرزولاييرديم، سنسه منيم گؤزله ديييم شيمشکسن! باخ، سن ظهور ائدندن گؤر نه حالا دوشموشم. سنه بسله ديييم حسد مني محو ائتدي! - گنج بئله دئييب آجي-آجي آغلادي. زردوشت اونو قوجاقلاييب اؤزونله آپاردي.
بير آز بو مينواللا گئدندن سونرا بو سؤزلري دئدي:
- اوره ييم پارچالانير. تهلوکه ده اولدوغونو سنين گؤزلرين سؤزلريندن داها ياخشي آنلادير.
هله آزاد دئييلسن، هله آزادليغي آختاريرسان. بو آختاريشين سني اوياديب، يوخونو دا سنه حارام ائديب.
آزاد زيروه لره جان آتيرسان، قلبين اولدوزلارا سوساييب. آمما سنين منفور ايستکلرين ده آزادليغا جان آتير.
ايچينده کي قودوز ايتلر آزادليغا داربنير: روحون بوتون بوخوولاري قيريب آتماق ايسترکن اونلار اؤز زيرزميلرينده سئوينجدن اولاييرلار.
منجه سن هله آزادليق آرزولايان محبوسسان؛ آه، بو محبوسلارين روحو عاغيللي اولدوغو قدر ده حيله گر و منفور اولور.
قورتولان روح هله تميزلنمه ليدير. حبسخانانين چيرک-پاساغي هله اونون اوستونده دير: هله اونون باخيشلاري تميزلنمه ليدير.
هه، سنين تهلوکه ني بيليرم. آمما سني آند وئريرم اؤز محبتيمه، اؤز اوميدلريم: سئوگيندن، اوميدلريندن واز کئچمه!
هله کي، اؤزونو نجيب سانيرسان؛ سني سئومه ين لرده، دالينجا آجيقلا باخانلار دا سني نجيب سانيرلار. بيل کي، نجيب انسان چوخلاري نين يولو اوستونده دايانيب.
نجيب کس خئيرخواهلاريندا يولو اوستونده دايانيب، اونلار نجيبه خئيرخواه دئينده اصلينده يولدان چيخارماق ايسته ييرلر اونو.
نجيب کس يئني بير شئي، يئني بير فضيلت ياراتماق ايسته يير. خئيرخواه ايسه کؤهنه ني، کؤهنه نين قورونوب ساخلانماسيني ايسته يير.
درد اوندا دئييل کي، نجيب خئيرخواها دؤنر، درد بوراسيندادير کي، او سيرتيغا، لاغبازا، داغيدانا چئوريله بيلر.
آه، نجيبلر تانيييرام کي، نه عالي اوميدلريني ايتيرديلر. و ايندي اونلار بوتون عالي اوميدلره شر آتيرديلار.
ايندي اؤتري اَيلنجه لره، احتيراسلارا قاپيليبلار: مقصدلري ايسه بير گونلويه گوجله يئتير.
"روح اؤزو ده شهوتدير" -بئله دئييرديلر. اوندا روحلاري نين قانادلاري سيندي: ايندي او روح هر يانا سورونور، ديشله دييي هر شئيي موردارلايير.
بير واخت اورکلريندن قهرمانليق کئچيردي، ايندي شهوت قوردونا دؤنوبلر. اونلارين قهرمانليغي گم و قورخودور.
سني آند وئريرم محبتيمه، اوميدلريم: قلبينده کي قهرماني آتما! عالي اوميديني مقدس ساخلا! -
زردوشت بئله دئدي.
 

حاضیرلایان : همت شهبازی


يازار هـ.شهبازی چهارشنبه 1388/07/22 ساعت 19:29 /لینک/(نقل با قيد منبع وبلاگ آزاد است)