ان سئويملي کيتابي نين ايچينده...

 
   


جاويدان (Cavidan)




  من سنين  
  بير آز ائتنيک  
  و بير آز دا ائکزوتيک*  
  ياباني داغ گولونم...  
   
   
  مني  
  کيمسه يه وئرمه يه  
  الين گلمز،  
  بيليرم...  
   
  اؤنجه بارماقلارينا،  
  سونرا کؤکسونه  
  قيسيلاجام،  
  اوستومه هوپاجاق  
  بدني نين قوخوسو...  
   
  سونرا ايسه  
  ان سئويملي کيتابي نين  
  ايچينده سيخيليب دا،  
  گيزله نيب ده  
  قالاجام...  
   
  سولاجام...  
   
   
  گلن دفعه ياشاماقچين...  
   
  سول اليمين ايچينده  
  عؤمور خطي  
  قيريق-قيريق،  
  هاچا-هاچا...  
   
   
  باش خطي نين سونونداسا  
  اولدوز يانير  
  تام  
  ساتورن بارماغي نين آلتينداجا...  
   
  بودور،  
  بو دا اورک خطي-  
  ايکي يئره بؤلونموش،  
  ايکي عشقين  
  بيري يئرين،  
  بيري ايسه گؤيونموش...  
   
  آه...  
  چئچله بارماغيمي  
  بوکونجه ده  
  بير درين  
  و  
  ايکي ظريف خط گؤرونور-  
  بير اوغولون،  
  ايکي قيزين ايشاره سي...  
   
  ال فورماسي- فلسفي،  
  باش بارماغيم-  
  ايراده و غورور رمزي...  
   
  بوشلا گؤرک زارافاتي،  
  خورافاتي،  
  خيرومانت!..  
   
  من  
  آلنيمدا آچيلاجاق  
  قيريشلاري گؤزله ييرم-  
  او خط لره  
  يئني عؤمور يازاجاغام  
  گلن دفعه  
  ياشاماقچين...  

  ____________ 
• بيگانه، مرموز 

حاضيرلايان: همت شهبازي 
   


يازار هـ.شهبازی شنبه 1388/03/30 ساعت 23:9 /لینک/(نقل با قيد منبع وبلاگ آزاد است)