بيرنفسه - 3  



ژاله 


  مني آلچا چيچکلري نين آهي توتدو -  
  اوره ييم گئديردي اونلاري بوداقلي-زادلي  
  قيرديرماق اوچون...  
  منه اريک چيچکلري قارغيش ائله دي -  
  قوخوسوندان دويمازديم...  
  بوتون ساري گوللرين غضبينه گلديم -  
  هاميسيندا گؤزوم قالاردي...  
  چيچکلرين ده مني سئوديينه  
  ايناناجاق قدر خوشبخت گونلريم واردي...  
   
  *  
  هئچ واخت: " هئچ واخت! " - دئمه.  
  من ائله بيريني سئوديم کي، سونوندا...  
   
  *  
   
  نه واخت اؤلمک؟  
  سني سئون سونونجو انساندان اؤنجه.  
   
  *  
  آزجا،  
  بير آزاجيق  
  اوزون اولسايديم،  
  داها تئز چاتارديم  
  آرزولاريما...  
  بلکه ده...  
   
  *  
   
  ياديما دوشمه ديين گونلرين  
  هئچ بيري ياديمدا قالمير...  
   
  *  
   
  دئمه ديين سؤزم، جانيم،  
  خاطيرلاماغا چاليشما...  
   
  *  
  تزه حرکات باشلاييب - گونشه دوغرو!  
  قوشولماياجام!  
  هئچ اولماسا کؤلگن کؤلگمدن بؤيوک اولسون!  
  هئچ اولماسا کؤلگنده گيزلنه بيليم!  
  هئچ اولماسا...  
   
  *  
   
  رومانلار اؤنجه ياشانار،  
  سونرا يازيلار،  
  سونرا اوخونار.  
  ترسينه ائدک دئييرسن؟  
   
  *  
   
  ايکيميز ده آلدانديق -  
  سن بؤيوک گؤرونوردون،  
  من بالاجا... 

حاضيرلايان: همت شهبازي 


يازار هـ.شهبازی سه شنبه 1388/03/05 ساعت 0:3 /لینک/(نقل با قيد منبع وبلاگ آزاد است)