پست مدرنيزم 


Postmodernizm is not what you think


 فرهاد آمور  



  پست مدرنيزم، قانونسوزلوغون قانون، اؤلکه سيزليين اؤلکه اولدوغو گؤروش، ياخود حيات طرزيدير. مدرن گؤروشون قارشيسينا آلتئرناتيو قويان بير گؤروش و تئخنولوژي اينکيشافي طبيعتله بوتونلشديريب اونون بير پارچاسييميش کيمي ياشايان اينسانلارين دوشونجه سينه تطبیق ائتمکدير.  
  چيخيش نؤقطه سيني 1972-جي ايلده آمريكادا، نظري قايناغيني ايسه فرانسيز پست-استروکتوراليست {پست قورولوشچو} آخيميندان، ژان-فرانسوا ليوتاردين 1979-جو ايلده يازديغي "پست مدرن دوروم" آدلي کتابيندان آلدي. مدرنيزمين (اولينده) سونراسيندا دئمکدير. معنا قايغيسي گودمه دن اينجه صنعتي آتوميزه ائتمکدير- عينن اينيشتينين نيسبي ليک نظريه سي کيمي.  
  "رسمين اؤنونده دئييل، آرخاسيندا گؤرونن بير شئي کيمي"، آيدينلانما ايدئالوگيياسي نين ايره ليله مه منطيقينه قارشي چيخدي، پست مدرن بير شئي هر دؤورون اؤز ديناميکاسي ايچينده مدرن اولان بير شئي مي؟  
  تمل اؤزللييي، (ايکينجي دونيا ساواشيندان سونرا) مارکسين يؤنتملري ايله گؤزل دونيا يارانماياجاق دئيه دوشونن مأيوس صنعتچي لرين "مارکسيزم" کيمي بؤيوک آنلاييشي زيبيله آتماغي اولدو. بيرينجي دونيا ساواشيندان سونرا ييخيلان "دوزن"-ين تکرار قورولا بيله جه يينه اينانان اينسانلار، ايکينجي دونيا ساواشي نين گتيردييي ييخيملا بو اومودلريني تامام ايتيرميشديلر. آرتيق دين، دؤولت و حتتا عايله کيمي بؤيوک قوروملارا اينانج قالماميشدي، چونکي بونلاردان هئچ بيري نين ساواشي اؤنله مه يه گوجو يئتمه ميشدير. پست مدرنيزم سوسياليزمين جسديني حب اولاراق قبول ائتدي.  
  گئرچه يي، اوتورموشلوغو، گووه ني و قارشيليقلي ليغي، اينسان علاقه لريني ردد ائتمه سييله سون درجه راديکال بير باخيشا چئوريلدي. اينسانلار گله جه يين نه لر گتيره جه ييني بيلمه ديکلريندن آرتيق "اينديني" ياشاماقداديرلار. اينسانلار بير شکيلده بير-بيرلري ايله علاقه قورماغي باجارسالار دا، بو ساده جه آنليقدير، کئچيجي دير.  
  پست مدرنيزم، شيزوفرئنياني و خاوسو {هرج مرج) ترجيح ائدر. آنارخييادير، فورما و يا مضمون باخيميندان فونکسيونال دئييلدير. پست مدرن دونيا يوخدان وار اولماقلا، آرزولارلا باغليدير. هانسي طرفيندن ياناشسان، فرقلي بير شئي تاپارسان، هر شئيي ايچينه آلا بيلندير، چونکي هئچ بير ليميتي (حد – حدود) يوخدور. گونشين آلتيندا يئني بير شئي وار، دونيا ان بؤيوک قارانليغي ياشاياجاق.  
  پست مدرنيزم، ايلک دفعه "معمارليق" اوزرينده "معمارليق آيرونيا داشيماليدير" پرينسيپي ايله تطبیق ائديلدي. تطبیق ائدن آدام، روبئرت وئنتورئ ايدي…  
  ماراقلي بير پارادوکس دا بوندان عيبارتدير کي، بير شئيين مدرن اولماسي اوچون اولجه پست مدرن اولماسي گره کير. پست مدرنيزم حاققيندا دئييلن لر:  
  لئوي استراوس: ديل دوشونجه ني، دوشونجه مدنيتي و مدنيت ده سيمووللاري يارادير. اينسان ذهني، ايکيلي قانونلارلا ايشلر.  
  ميشل فوكو: تاريخ يوخدور، بيلگي اقتداردير و عاغيل گوناهکاري يارادير.  
  "پست مدرن فئمينيزم" کيشي دوشمني دير. قانونا اويغونلوغو ساخلايان تک پست مدرن فئمينيست ايسه ژوليا کريستوادير، ژوليا کريستوا: قادين يوخدور، او هله دوغولوش عرفه سينده دير.  
  مارسل مس.لوهان: گونوموزده پست مدرن قهرمانلار اولدوزلار دئييل، سياستچي لردير. پست مدرنيزمين سياستي يئني ساغچيليقدير، بو آداملار آمريكا کيمي اؤلکه لري لوناپارکلارا چئويره جک. پست مدرن اينسان "فاست فوود"-ون اينسان تيپي دير. پست مدرن موسيقي ائتنيک موسيقي لرين سينتئزه دؤنمه سي و پست مدرن ذؤقه خيدمت ائتمه سيدير. پست مدرن قورخوسوزلوغو سئچيمله قارشي-قارشييا گلمه يه سئوگي دير. اينساني روح و بدنه بؤلن آنلاييشلارلا حسابلاشماماق، تک و مطلق دوغرونون هئگئمونلوغونا قارشي چيخماق. پست مدرنيزم مدرنيزمي ييخار، آنلاتديقلارينا قارشي چيخار، فقط يئرينه بير شئي قويماز.. هر شئيي ادعا ائدن پست مدرنيزمين طبيعتينده هئچ نه يي ادعا ائتمه مک ده وار. آيريجا مدرنيزم اؤزو ييخيجي دير، اؤزو اؤزونه قارشي پست مدرن فيکير يارادير. اينسانلار آرتيق عوموميدن چوخ، فرقلي دوشونجه لره اينانيرلار. قاتي اولان بير شئي ياواش- ياواش داغيلماغا باشلار، يئرينده چوخ سايدا ائلاستيکلري {كشدار} قالار. اينفورماسييانين و متنين اؤنمي آرتار، زامانين و مکانين اؤنمي آزالار. اينفورماسييا بومباردمانييلا خاوس اورتايا چيخار. اينديکي پست مدرنيزمين ييخديغي مدرنيزم بلکه ده باشقا پست مدرنيزم طرفيندن قورولماغا باشلاياجاق. اصلينده تاريخ دئيه بير شئي ده يوخدور. يعني معنا فيلم لرده اولدوغو کيمي کادرلارين آخيني ايله دوزه لير.  
  مشهور، آما سئويلن آدامين اؤلومونه اينسانلار دوغرودانمي ياس توتورلار؟ سوالين جاوابي "خئير" دير، بو آداملار بيزيم اوچون فيلم قهرمانلاري کيميدي و بونلارين اؤلومونه ده فيلمده کي قهرمانيميزين اؤلومو قدر ياس توتوروق.  



  يؤنلنديريجي سؤزلوک:                                                                                                                    

  مدرنيزم / پست مدرنيزم  
  فورما (قاپالي) – آنتي فورما (آچيق)  
  مقصد - اويون  
  رومانتيزم - سيمووليزم  
  اييئرارخييا {نظم} - آنارخييا  
  يورولما – سسسيزليک  
  پروسئس - پئرفورمانس {اجرا، ايفا، نمايش}
  سينتئز - آنتيتئز  
  وارليق - يوخلوق  
  سئچيم – کومبيناسييا {يوغرولماق، تركيب، آميزش، اختلاط}  
  کؤک – درينليک  
  اوخونا بيلينن – يازيلا بيلينن  
  ييغيشديرماق - داغيتماق  
  آنلامسال - ريتوريک {دئييم طرزي، فن ِ بيان}
  اؤرنک – سؤزگه ليشي  
  مئتافورا - مئتونومييا  
  آچيقلاما - يانليش اوخوما  
  تيپ - موتانت  
  پوليمورفوز {چند ريختي} – آندروگئن {ايكي جينس لي} 
  پارانويا - شيزوفرئنييا  
  قايناق – سبب  
  مئتافيزيکا - ايرونييا  
  خاريجي - داخيلي  
  ايفاده ائديلن – ايفاده ائدن


  
حاضيرلايان : همت شهبازي                                                                                                                        


  http://kultaz.com/2008/09/12/postmodernizm-is-not-what-you-think 


يازار هـ.شهبازی جمعه 1388/03/01 ساعت 1:32 /لینک/(نقل با قيد منبع وبلاگ آزاد است)